طارق .. انا عمرى ما عرفت طارق .. ولا حتى أعرف شكل طارق .. بس مؤكد أنى حسيت بروح طارق
قابلت طارق مرة فى تدوينة ... مش هو شخصياً .. لكن تدوينة بتكلم عنه .. عن روحه
تدوينة كتبتها حبيبة طارق .. بتفتكره فيها .. لأنه مات من 8 سنيين
أول مرة تدوينة تأثر فيا لدرجة أنى أنوى من يوميها أنى أكتب عن طارق ..
لدرجة أنى دمعت فى أخرها .. دمعت على طارق ..
من ساعتها كل ما أفتكره بقول "الله يرحمك يا طارق"
التدوينة دى أهداء لـ روح طارق ...
لو فى يوم صاحبة التدوينة الأصلية وافقت أنى أنشر لينك التدوينة الأصلية ... هنشره ..
"تحديث": التدوينة الأصلية .. Ode to tarek
"أنا كنت عاشق زي كتير ..
فقير وبيكي هبقى أمير .."
إنتا كنت حلو أوى يا طارق، مش بقصد خلقتك يعنى ..
بلاش تتقمص، ومتفهمنيش غلط ومتكشرش بس إستنى ياعم متبقيش حمئي كده ..
أقصد ان مش خلقتك بس ... لا وكمان روحك :)
أنا مشفتكش بقالى زمان 8 سنيين تقريباً، بس ملامحك دى محفورة جوايا..
ماتهتش وسط الوشوش صدقنى .. بحس إنك واحشانى أوى
بص يا طارق ..
مفيش حاجة سهلة فى الدنيا زى كتابة الذكريات ..
أى حد فى الدنيا يعرف يكتب ذكريات وذكريات حلوة كمان ..
بمنتهى السهولة يقدر يخليك تضحك تبتسم جسمك يقشعر ولو واحد محترف كتابة ممكن يخلى عينيك تدمع ..
الذكريات وتر حساس جداً فى حياتنا، أى حركة بسيطة ليه كفيلة بإثارتنا عاطفياً ..
يمكن علشان كده مش عايزة أتكلم عن أى ذكريات مشتركة مابينا ..
بحاول أكون هادية عاطفياً الأيام دى، بمعنى أكثر صراحة باردة عاطفياً ..
مش عايز أى نوع من أنواع الأثارة العاطفية ..
مهما كانت ذكريات قليلة أفضل إنها تبقى مابينا ..
بس الذكرى دى مقدرش أمنع نفسى عن كتابتها ..
يمكن علشان أقربهم لقلبى، يمكن علشان كل مبفتكرها بضحك، وساعات بعيط..
"رسمت قصرك في خيالي ..
فضلت أحاصرك بآمالي.."
أنا : أنا إمبارح ماما زعقتلى بسببك ..
طارق: أنا ليه كده ..
أنا : علشان إنتا قولتلى إنك بتطير كل يوم بليل الساعة تلاتة، صح مش إنتا قولتى كده
طارق: اه صح
أنا : طيب ماشى أنا فضلت صاحية إمبارح بليل لحد الساعة تلاتة ودخلت البلكونة وفضلت مستنياك إنك تطير بس إنتا ما طيرتش ولا حاجة وماما دخلت لقتنى قاعدة سقعانة فى البلكونة وزعقتلى وقالتلى إنتى كده حيجيلك برد، بس أنا مارضتش أفتن عليك على فكرة
طارق : بس أنا طرت إمبارح والله ..
أنا : بجد والله طب طيرت روحت فين ..
طارق: فاكرة لما فضلت أقولك ان حصان البحر مش كائن خيالي بعد ما اصطدناه عشان تبطلى عياط ؟!
أنا : اه فاكرة ..
طارق: بعد ما روحنا فضلت أطير وأقطفلك فى ورد علشان عارف أنك بتحبى الورد رغم انك بتقعدى تزعقيلى أن الورد هيموت ... بس انا عارف انك بتحبى الورد :) .. يوميها فضلت أطير لحد ما تعبت روحت طرت تانى و رجعت بيتنا، إنتى مشوفتنيش إزاى؟!
أنا : إنتا بتكدب والله، محدش أصلاً بيعرف يطير هه، وكمان الورد مش بيبقى موجود بلليل، إزاى بقى قطفته ؟؟ ..
طارق بزعل : خلاص لو مش عايزة تصدقينى متصدقينيش، بس لعلمك أنا مش كداب ومتجيش تقعدى عند الكشك بقى مع واحد كداب تانى يا ريت ..
أنا : خلاص يا طارق مصدقك :)) .. يا بتاع الياسمين، مين ينده لك مين؟ واحنا معانا الفل :)
"لحد م أنتي يا حلم بعيد..
لقيتي حالك من حالي.."
ساعات وتحت تأثير النفسية المضطربة ..
أقعد أقول أنك كنت شخصية وهمية لا أساس لها من الصحة..
فـ أروح لأمى وأقعد أكلمها فى أى حاجة
وفى النص أقوم أسئلها "فاكرة طارق ولا نسيتيه يا ماما؟!" ..
ترد وتقولى "كان على بالى والله أمبارح وقعدت أدعيله ... الله يرحمه"
"مشيت وإيدك في ايديا..
مش يوم لا لا لأ مية.."
"حضنت صورتك في عينيا..
حب وحنية"
حاول تعرف معايا يا طارق معنى كلمة حزن ..
أنا شخصية لا تجيد التعبير عن مشاعرها خاصة الحزن ..
عادةً أنا لا أضحك فقط أبتسم، أو أضحك مجاملة، ضحكى النقى بقى نادر جداً ..
الحزن يا طارق ممكن يكون صداع هو ده اللى ممكن أقوله ..
تعرف ..
ف يوم رجعت بيتنا مصدعة .. مددت على سريرى وأفتكرتك
أفتكرت اول يوم اتقابلنا في ابتدائي ومحدش رضي يقعدني وانت وسعت لي مكان جمبك وقعدتنى :)
فضلت أضحك يوميها .. :))
"ولما كنت أعطش وأضيع..
كنت أترمي في أجمل تقاطيع.."
"ألاقي فيهم كنز كبير..
م أنا عاشق زي كتير"
عملت كوباية شاى ودخلت البلكونة...
لقيتك واقف قدامى ساند على السور وبتبص على الشارع ..
كنت عارفة إنك من وحى خيالى ..
بس أنا عمرى ماصدقت خيالى أد الساعة دى ..
ماكونتش ساعتها لابس أبيض فى أبيض ووشك بيشع بنور ملائكى ..
أنا خيالى مش ساذج أوى كده ..
كنتى عادي جداً وجميل جداً ..
مكونتش بتكلم ساعتها كنت عمال أبصلك وأنا فرحانة ..
كنت عايز أقولك كل حاجة وأى حاجة ..
كنت هقولك تعالى نلعب مع الضفادع اللي في الجنينة اللي ف ضهر المدرسة ..
كنت هقولك تعالى نروح المول نجري ورا بعض زى زمان ..
كنت هقولك تعالى ناكل جيلاتي ع البحر والدنيا بتشتي ..
"إحساسي قالي إني أستاهلك..
فكرت تبقيلي حلالي.."
"جريت عليكي أندهلك..
وحصاني ناطط في العالي"
أنا: سيبك من لعب العيال دا :)) .. أنا من 8 سنيين وانا نفسى أقولك حاجة مهمة
طارق: أيه يا ترى الحاجة المهمة دى :))
أنا: إنت ليه مطلعتش شبه توم كروز يا طارق ؟!
طارق: خلقة ربنا :)
أنا: أو حتى براد بيت :)
طارق: مممممممممممممم
أنا: ساكت ليه ؟؟!
طارق: يعنى أنا لو شبه واحد فيهم كنت هبصلك ليه؟!
أنا: نعم ؟؟ ... بتقول أيه ؟؟!
طارق: قصدى يعنى أن أكيد مافيش واحد فيهم كان هيحبك أدى :))
"اكمني عاشق على قدي..
والحب والهوى راسمالي..
"رجعت.. ايدك يا حبيبتي مش في ايديا"
طارق: على فكرة أنا عارف إنتى بتفكرى فى أيه
أنا : بجد، طب أنا بفكر فى أيه
طارق : بتفكرى إن الساعة قربت على تلاتة، و إنك مستنية تشوفينى وأنا بطير علشان تعرف إذا كنت بكدب عليكى ولا لأ
أنا : بس أنا كنت مصدقاك يا طارق
طارق: عارف إنك مصدقانى، أنا نفسى كنت مصدق إنى بطير بليل علشان كده ماما كانت بتصمم إنها تنام جنبى بليل علشان معملش أى حركة مجنونة ,بس إنت عارفة أنا حطير النهاردة علشان خاطرك بس .. انا خطير وبطير :)
يرفع رجله ويقف ع السور
طارق يبصلى ويضحك : علشان تفضلى مقتنعة بس إنى مكونتش بكدب.
أنا : مصدقاك والله يا طارق والله مصدقاك، خليكى بس قاعد معايا شوية، أنا مش عايزة أشوفك وإنت بتطير والله، أنا عايزك بس تقعد معايا ولو لخمس دقايق بس علشان خاطرى ..
يلتفت إلى : خلى بالك من نفسك :)
يقفز فى الهواء، يفرد ذراعيه ثم يطير، أراقب إبتعاده وللأول مرة أشعر بكم سأفتقده ..
"قضيت سنين مالهاش معنى..
مانستش ولا ليلة موضوعنا..
"مانكرش عقدني شوية.. وأثر فيا"
ليست هناك تعليقات:
إرسال تعليق