الأغنية دى سمعتها أول مرة لما نزلت فيديو كليب على قناة ميلودى فى 2005 وكنت بحبها جداً وكانت كل ما تيجى ع التلفزيون أفضل واقف فى مكانى لغاية لما تخلص، وبرضه كنت بسمعها وانا قاعد بلليل ع السرير وظابط الراديو على محطة "راديو سوا" لكن عمرى ما عرفت أسمها ولا أسم اللى بيغنيها، ومن يوميها وانا بدور عليها، تقريباً بقالى تسع سنيين بدور على الاغنية دى بحاول أفتكر كلمة من كلماتها أو حتى أسم المغنى اللى بيغنيها، لكن مش قادر أفتكر ومحدش عرف يساعدنى.
دلوقت وانا قاعد هاتف ربانى أوحى ليا بمقطع من كلمات الأغنية وقالى أعمل بحث عليها، وفعلاً لاقيت الأغنية ... بعد تسع سنيين بحث أخيرااااااا لاقيتها .. والله العظيم أنا دمعت لما أتلاقيت الكليب لأنى مكنتش متوقع أنى فى يوم هلاقيه .. أتفرجت عليه مرة واتنين وتلاتة وانا مش مصدق .. تسع سنيين والله
الكليب لـ شاب ليبى أسمه أيمن الأعتر معملش إلا الألبوم دا فى 2005 وعمل فيديو كليب بأسم "بحبك" .. صوته فعلاً ملائكى
يا غايب عني و معايا
يا سامع قلبي جويا
يا أحلى بداية و نهاية
تعالى و قولي حالك إيه ..
منايا بس أنا أطمن
بـ كلمة عليا بتهون
غيابك عني مش هين
يا ريتك حاسس اللي أنا فيه
ليست هناك تعليقات:
إرسال تعليق